ثلاثة شباب... وجيشٌ من المحبّة غزا أمريكا

ثلاثة شباب... وجيشٌ من المحبّة غزا أمريكاد. موسى العوضات ما احتاجوا وكالة إعلانات ، ولا ميزانية بالملايين ، ولا تصوير سينمائي. ثلاث شباب أردنيين شدّوا الرحال لأمريكا بداية أيام كأس العالم، ومعهم خيمة، وطنجرة منسف ، وشماغ أحمر ، وقلب مفتوح على آخره.نزلوا بين الناس ببساطتهم ولبسوا العقال والشماغ كأنهم جايين من مضافة في البلقاء أو الكرك . نصبوا خيمتهم ، ولّعوا النار ، وطبخوا المنسف الأردني بريحته اللي بتجيبك من آخر الشارع. ما حدا سألهم "مين إنتوا؟" الكل وقف يتفرّج ويشمّ ويضحك . وكان سلاحهم الأقوى: الإنجليزي المكسّر. كلامهم مش مزبوط 100%، لكنه صادق 1000%. كلمة "Welcome, my friend, this is Jordan food ، كانت أقوى من ألف بوست ممول. الضحكة، والإشارة بإيدهم ، والحركة العفوية، خلّت الأمريكي يحس إنه واقف قدام أخوه مش قدام مُعلِن .روّجوا لمطعم غماس، و الجميد الكركي، و*بن العميد*، والسمن البلقاوي، وبضاعة أردنية أصيلة. مش كإعلان. حكيهم كان نابع من الغيرة على بلدنا : "هاي من الأردن يا زلمة "ما وقفوا عند الأكل. وزّعوا الشماغ الأردني على رجال الأمن الأمريكي، لَفّوه على راسهم ، وتصوّروا معهم ، وضحكوا ودبكوا . معهم كأنهم معرفة قديمة . زاروا عائلات أردنية مغتربة ، قعدوا معهم ، سمعوا وجعهم ، وذكّروهم بريحة البيت. أسلوبهم؟ راقي رغم بساطته. دخل القلب من أول نظرة. عملوا للسياحة الأردنية ولمنتجاتنا دعاية ما عملتها وزارة السياحة نفسها، لأنه الناس بتصدّق اللي طالع من القلب.هذول الشباب ما روّجوا لمنتج، روّجوا لمعنى : الأردني وين ما راح بيشيل وطنه معه. بشيله بالشماغ، بالكرم، بالمنسف، بالكلمة الطيبة، حتى لو نطقها بالإنجليزي غلط. وفعلاً... اخترقوا القلوب. لأنه بالأخر ، الناس ما بتنسى الأكل ، بتنسى الإحساس اللي وصلك مع الأكل . وهذول الشباب وصّلوا إحساس اسمه : الأردن.